جميع النصوص
الوحدة
إذا سألتني عن أصعب شعور ممكن يصيب أي إنسان، حأقول ليك الوحدة.
الوحدة ما إنك تكون وحيد، الوحدة شعور بعدم الإنتماء، شعور حبة الخرز الفرّت من العقد، شعور إنك أبتر وما عندك إمتداد.
كتير الإنسان ممكن يكون وحيد = لحاله، لكن ما حاسس بوحدة. وكتير بيكون وسط جموع لكن مغترب حتى من نفسه.
Not lonely but alone.
الشعور دا أهل النار كانوا بيتمنوا انه يكون معاهم رفيق عسى ولعل يشفع ليهم او حتى يخفف عنهم " فما لنا من شافعين ولا صديق حميم" لكن ربنا بيرد عليهم في موضع آخر " ولن ينفعكم اليوم إذ ظلمتم أنكم في العذاب مشتركون".
وكان من نعيم الجنة انهم حيلتقوا بأحبابهم ويأنسوا بيهم " هم وأزواجهم في ظلال على الارائك متكئون".
إيلون ماسك كان مرة بيعلق في تويتة انه " إذا كان في اله ويوم آخر فأنا ما عندي مشكلة لو حنتحاسب كلنا". في إشارة لأنه زي ما بنقول "موت الجماعة عرس".
لحظات كتيرة ما بيكون مهم انك في مصيبة، بقدر ما انه هل أنا براي البعاني؟ لأنك محتاج للانتماء حتى في الألم عشان تديو هوية.
"Pain shared is pain given a name"
في واحدة من أروع أفلام توم هانكس، بيحكي عن انه كان في رحلة جوية وطائرته وقعت في جزيرة مهجورة في المحيط الهادي، وكان هو الناجي الوحيد.
أتعلم في البداية كيف يشعل النار وكيف يلقى أكله وكيف يتعايش، لكن بعد فترة هاجمه الشعور الأصعب = الوحدة.
يقوم توم هانكس يصنع دمية من كرة طائرة لقاها ويسميها ويلسون، كرفيق وحيد في الجزيرة دي ويبدأ يحكي لويلسون دا كأنه شخص حقيقي، رغم انه عارفه دمية وهو الصنعه.
أجمل لقطات الفيلم وأحزنها لمن فقد ويلسون في البحر وقعد يبكي :
“ Wilson, I am sorry Wilson!”.
بكاه ما كان على فقد الدمية ولكن على رجوعه لوحدته تاني وفقده للشاهد الوحيد على معاناته في الجزيرة.
كتير من التسلية في البلاء بتكون انه ما تكون براك ، او تشوف مصائب ناس تانية تهون عليك ودا الكان بيحصل للرسول عليه الصلاة والسلام بنزول الوحي.
واحدة من مقولات الطيب الصالح المفروض تتبروز:
"الحياة يا محيميد ما فيها غير حاجتين إتنين الصّداقة والمحبة. ما تقول لي لا حسب ولا نسب ولا جاه ولا مال. ابن آدم إذا كان ترك الدنيا وعنده ثقة إنسان واحد يكون كسبان وأنا المولى عز وجل أكرمني بالحيل، أنعم على بدل النعمة نعمتين أداني صداقة محجوب وحب فاطمة بت جبر الدار".
لمن يشتد عليك بلاء، ادعي ربنا يديك رفيق يسليك، عسى يكون أخف عليك وما ينقض ظهرك.